سياسة الخصوصية
آخر تحديث: ١٣ نوفمبر ٢٠٢٦
وزيري تطبيق لإدارة فلوسك على موبايلك، من محمد كامل. الصفحة دي بتقولك بالظبط إيه اللي بيفضل على موبايلك وإيه اللي بيطلع منه.
على موبايلك
كل اللي بتسجّله في وزيري بيتحفظ على موبايلك بس. النسخة دي من وزيري مافيهاش حساب ولا تسجيل دخول، فمش بتطلّع أي حاجة من بياناتك برّه الموبايل: لا مبالغ، ولا أسماء محافظ، ولا أي حاجة عنك.
قراءة الإشعارات (اختيارية)
مقفولة لحد ما تشغّلها بنفسك من الإعدادات. ولما تشتغل، وزيري بيقرا إشعارات البنوك والمحافظ على الموبايل نفسه عشان يقترح عليك تسجيلها. نص الإشعار ما بيطلعش من الموبايل، وما بيدخلش في نسخة الموبايل الاحتياطية. اللي بتوافق على تسجيله بس هو اللي بيتحفظ، زي أي حاجة سجّلتها بإيدك.
أسعار العملات
بتتجاب من موقع أسعار عام (open.er-api.com). وزيري بيطلب جدول الأسعار بس، ومش بيبعت معاه أي حاجة عنك ولا عن فلوسك. الموقع بيشوف عنوان اتصالك بالإنترنت، زي أي موقع بيتفتح.
قايمة شعارات البنوك والمحافظ
شعارات البنوك والشركات الجديدة بتتجاب من موقع وزيري (logos.wazeery.com) مرة كل أسبوع تقريبًا. التطبيق بيطلب القايمة كلها زي ما هي، ومش بيبعت أسامي محافظك ولا أرصدتك ولا أي حاجة عنك. الموقع بيشوف عنوان اتصالك بالإنترنت زي أي موقع. والشعارات ملك أصحابها، وبتظهر بس عشان تعرف المحفظة بتاعة مين؛ وزيري مش تابع لأي بنك أو شركة.
نسخة الموبايل الاحتياطية
لو النسخ الاحتياطي بتاع الموبايل نفسه شغّال، ممكن ياخد نسخة من بيانات وزيري مع باقي تطبيقاتك على حسابك في جوجل. اللي بيتقرا من الإشعارات والاقتراحات مش بيدخل فيها. التحكم فيها من إعدادات الموبايل.
القفل وإخفاء المبالغ
الاتنين بيحموا من اللي يبص على الموبايل أو يمسكه وهو مفتوح. مش تشفير، ومش بيمنعوا اللي يقدر يوصل لملفات الموبايل نفسها.
من غير إعلانات ولا تتبّع
مفيش إعلانات في وزيري، ولا أدوات تحليل، ولا تتبّع لاستخدامك. ومش بنبيع بياناتك ولا بنشاركها مع حد.
الأذونات اللي التطبيق بيطلبها
الإنترنت: للأسعار وقايمة الشعارات بس. البصمة: لقفل التطبيق لو شغّلته. قراءة الإشعارات: لو شغّلتها بنفسك.
مسح بياناتك
لأن بياناتك على موبايلك بس، مسحها في إيدك: من جوّه وزيري (الإعدادات ← «امسح بياناتي من الموبايل ده»)، أو امسح التطبيق، أو امسح بياناته من إعدادات الموبايل (التطبيقات ← وزيري ← التخزين ← مسح البيانات). مفيش نسخة منها عندنا نمسحها.
الدفع
النسخة دي مجانية ومافيهاش أي دفع. لو اتضاف اشتراك بعد كده، هيبقى عن طريق جوجل بلاي، والسياسة دي هتتحدّث قبلها.
الأطفال
وزيري مش معمول للأطفال تحت ١٣ سنة.
لو السياسة اتغيّرت
النسخة الجديدة هتتنشر هنا بتاريخها. ولو اتضاف حساب أو مزامنة بين أكتر من موبايل، هنكتب هنا الأول إيه اللي بيطلع من الموبايل وفين بيتحفظ، قبل ما الميزة توصلك.
للتواصل
لأي سؤال عن خصوصيتك: [email protected]